Posted by: basem | 24/06/2012

أفكار سريعة عقب فوز محمد مرسي .. عن التحركات القادمة

مش ناوي أكتب بالفصحى ولا أحط أي مقدمات أو خلفيات تاريخية وتحليلية .. هما شوية أفكار مبعثرة وعايز أجمعهم

علينا أن ندرك إن نجاح مرسي كان الغرض منه منع تقدم الفلول وبقايا النظام من التقدم بعد كمية الأرض اللي كسبوها خلال الفترة اللي فاتت .. والهدف ده تحقق بمجرد إعلان النتيجة

خبر فوز مرسي أو بالأحرى خسارة شفيق هو دفعة معنوية وقبلة حياة للثورة اللي كانت بتتخنق في الفترة الأخيرة زي ما كان خبر فوز شفيق هيكون قبلة الحياة لنظام الحزب الوطني اللي كان في الإنعاش

أنا إلى حد ما فاصل بين نظام الحزب الوطني ونظام الدولة العسكرية لأن نظام الدولة العسكرية هو الكبير اللي الليلة دي كلها حاصلة برعايته وهو مستقر ومصالحة أكبر من إنه يكون اتهز في أحداث يناير وكلنا شفنا إزاي تحايل عليها لتثبيت أركانه .. الفائدة الوحيدة إننا شلنا واجهته المدنية وخلينا المواجهة معاه أسهل ولفتنا أنظار الناس لأصل الفساد والاستبداد في مصر

مصر متحولتش لدولة دينية بزرار دوسنا عليه بمجرد نجاح مرسي ولكن فعلا في معركة طويلة هتتم في السنين الجاية بين الإخوان والعسكريين ده هيكون مضمونها .. واللي بيتكلم عن الصفقة واتفاقهم أؤكدله إن لو في اتفاق هيكون اتفاق قصير المدى لأن مصالحهم متعارضه وجوبا على المدى الطويل

مش مطلوب مننا إننا نكمل أخطاءنا في السنة ونص اللي فاتوا بإننا نبقى أفراد متفرقين ملناش كيانات تنافس على السلطة ونضطر في كل مرة إننا ننقسم بين العسكر والإخوان أو إننا نحارب معارك مش معاركنا أو إننا ناخد مواقف سلبية مش بتأثر على سير المجريات

ما بين أصدقائي ودوايري على تويتر بسمع اتجاهين للتفكير:

1- مرسي ينفذ تعهداته ويفرج عن الأسرى في سجون العسكر ويلغي معرفش ايه ويعمل ايه ويرجع ايه

2- يسقط الرئيس الجديد وانا هنضم لمعارضته من أول يوم

في رأيي مع كامل الاحترام للآراء إن الاتجاهين فيهم مشكلة

بالنسبة للأول فمرسي في النهاية هو مرشح الحلم الإخواني مش حلم الثورة .. وأي عروض إيجابية قدمها في الفترة اللي فاتت كانت مسألة برجماتية وسياسية محضة .. في أحسن الأحوال هيلتزم بيها على المدى القصير – ده لو مخالفهاش ابتداءً – بس الأكيد إنه مش هيلتزم بأحلامنا على المدى الطويل لأن زي ما قلت إن مصالح الجيش والإخوان متعارضة على المدى الطويل .. مصالحنا ومصالح الإخوان متعارضة على المدى الطويل برضه.

بالنسبة للثاني ففكرة يسقط الرئيس القادم فكرة طفولية بتخرجنا من فكرة البناء الطويل المدى ومأسسة الثورة لتغليب التحركات اللاغائية في الشارع واللي خسايرنا فيها بتكون أكبر وبلا هدف واضح في العادة وهي الغلطات التاريخية اللي عملناها في السنة اللي فاتت وعملتها كل الثورات اللي فشلت في أوكرانيا وألبانيا ودول وسط آسيا. كمان مش مطلوب مننا نكون عون للدولة العسكرية على الرئيس المدني طالما التزم معنا زي ما مش مطلوب مننا اننا نحارب معركة الإخوان للسيطرة التامة على البلد.

مطلوب مننا نتحرك بمهارة الجراح بحيث أن نحصن مصر ضد عودة دولة الفساد دون السقوط في دولة الاستبداد الديني أو دولة الاستبداد العسكري اللي كل واحدة فيهم مسيطرة على جزء من الدولة دلوقتي .. الفلول على الشبكات القديمة والعائلات وأموال رجال الأعمال الطائلة وأجزاء من بيروقراطية الدولة وأجهزتها الأمنية .. والإخوان على الرئاسة وتنظيمهم المحكم والبرلمان السابق وفي الغالب البرلمان القادم .. والجيش على قلب الدولة الصلب والسلاح وأكثر الأجهزة الأمنية احترافا وأكبر جزء من الاقتصاد.

مطلوب مننا نتعامل بذكاء ونتحرك على محورين هو تحصين مصر الثورة ضد مصر الفساد وفي نفس الوقت تحصين مصر من السقوط في غياهب المشروع الإخواني.

مطلوب مننا بدل ما ندمر توازن العسكري/الديني لصالح أحدهما والاثنين مكروهين نضيف أثقال أخرى للتوزان ما يمكننا من إننا ننافس بقوة في المدى المتوسط ونختار شكل الدولة في المدى الطويل .. هل توازناتها مدنية/عسكرية أم مدنية/دينية أم مدنية/دينية/عسكرية أم محسومة لأي منها.

مطلوب مننا منحاربش كأفراد ونبدأ بسرعة وجدية نبني تياراتنا ومشروعاتنا البديلة أيا كانت علشان تنافس مشروع الدولة الدينية ومشروع الدولة العسكرية.

مطلوب مننا نكبر ونمثل أرقام أخرى في المعادلة عشان منضطرش في كل مرة ننقسم بين اختيارين مكروهين وننطحن في صراع ديناصورات زي اللي شهدناه طول الفترة اللي فاتت بين الديناصور الإخواني والديناصور العسكري.

Advertisements

Responses

  1. كلام حلو و متزن و الاهم مش حنجورى


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

التصنيفات

%d مدونون معجبون بهذه: